|
2006 ވަނަ
އަހަރުގެ ސިޔާސީ ޝަޚްޞިއްޔަތު
09/01/2007
| ދިޕޮލިޓިކްސް
މައުމޫނު ޢަބްދުލް ޤައްޔޫމަކީ އެއްގޮތަށްވުރެ ގިނަ ގޮތްގޮތުން މި
ލަޤަބު ދިނުން ޙައްޤު ބޭފުޅެކެވެ. 1977 އިން ފެށިގެން
މިއަދާހަމައަށް ދިވެހި ޖުމްހޫރިއްޔާގެ ރައީސްކަމުގެ މަޤާމުގައި
ހުންނަވައި، މިދިޔަ 2006 ވަނަ އަހަރުގެ ތެރޭގައި އޭނާގެ ސާރުކާރަށް
ކުރިމަތިވި ސިޔާސީ އިދިކޮޅު ހުދެމާއި ގޮންޖެހުންތަކާ
ކުރިމަތިލައްވާ، އެކަމުން ސަލާމަތްވެ، ރޭވުންތެރިކަމާއިއެކު 2007
ވަނައަހަރުގެ ތެރެއަށް ތިޔާގި ބެޖެޓަކާއިއެކު، ޤައުމައިގެން
ކުރިއަށް އޭނާ އަޅުއްވާފައި މިވާ ފިޔަވަޅަކީ، މިމަޤާމު އޭނާއަށް
ދިނުން ޙައްޤު މައިގަނޑު ސަބަބެވެ.
ދިވެހިރާއްޖޭގެ ސިޔާސީ މަސްރަޙަށް އަންނަމުންދާ ބަދަލުތަކާއި،
މަލްޓި ޕާރޓީ ޕޮލިޓިކްސްއާއި އެކު، މެދެކެނޑުމެއްނެތި ރައީސް
މައުމޫނުގެ ސަރުކާރަށް ވަނީ، ތަފާތު އެކިގޮތްގޮތުން ސިޔާސީ
ގޮންޖެހުންތައް ކުރިމަތިވެ، ސީދާ އޭނާގެ ސަރުކާރުގެ އިސްތިއުފާއަށް
ގޮވާލެވި، ސަރުކާރު ވައްޓާލުމުގެ މަސައްކަތްތައްވެސް ހިނގާ ގޮސް،
އެކަންތައްތައް ފޭލިވެ، ތާރީޚުގެތެރެއަށް ގޮސްފައެވެ. ގަދަބާރުން
އޭނާ ވެރިކަމުން ދުރުކުރުމަށް ކުރެވުނު މަސައްކަތްތަށްވެސް، މިދިޔަ
2006 ވަނަ އަހަރުގެ ނިޔަލަށް ރައީސް މައުމޫނު ވަނީ ފުރިހަމަ
ހުއްޓުވުމަކަށް ގެނުވާ، އިދިކޮޅު ޕާރޓީ، އޭނާގެ މޭޒަށް
ޞުލްޙަވެރިކަމާއިއެކު ޙާޟިރު ކުރައްވާފައެވެ.
މައުމޫނު ޢަބްދުލް ޤައްޔޫމް ޕާރޓީ ސިސްޓަމާ ކުރިމަތިލެއްވީވެސް
އޭނާގެ ޤިޔާދަތާއި ރޭވުންތެރި ސިޔާސަތުގެ ދަށުން، ސިޔާސީ ޕާރޓީއެއް
އުފައްދަވައިގެންނެވެ. އިދިކޮޅު ޕާރޓީއަށްވުރެ ފަހުން އޭނާގެ ޕާރޓީ
ވުޖޫޖަށް އަޔަސް، އަދި ތަނުގެ ދުސްތޫރީ ނިޒާމު ކޮންމެގޮތަކަށް
އޮތަސް، ބޭރުފުށުގެ ފެނުމަށާއި، ސިޔާސީ މައިދާނުގެ އެތެރޭގެ
ޙަޤީޤަތްތަކަށް ބަލާއިރު މިހާރު ވެރިކަންކުރާ ޕާރޓީއަކީވެސް އޭނާގެ
ޕާރޓީ ކަން ޤަބޫލުކުރަންޖެހެއެވެ.
ޤައުމުގައި ޑިމޮކްރަސީ ހަރުދަނާ ކުރުމުގެ ފިކުރާއިއެކު، މައުމޫނުގެ
ވެރިކަން ބަދަލުކުރުމުގެ ފިކުރަކީވެސް ފެތުރިފަވާ ފިކުރެއްކަން
ޤަބޫލުކުރަން ޖެހެއެވެ. އެހެންނަމަވެސް، ތަޢްލީމީ ޒުވާނުން އޭނާގެ
ސަރކާރުގެ ކުރީ ސަފަށް ނެރުއްވައިގެން، އުފެދިފައިވާ އިދިކޮޅު
ޙަރަކާތާއި ކުރިމަތިލައްވާ، ޚުދު މައުމޫނާއި އޭނާގެ ޕާރޓީއާއި
ސަރުކާރަކީވެސް ޑިމޮކްރަސީއާއި އިޞްލާހަށް މަސައްކަތްކުރާ
ޖަމާޢަތެއްކަން ތަފާތު އެކި ސިފަސިފައިގާ ދައްކަވާ، ރައްޔިތުންގެ
ވިސްނުމާއި ފިކުރުގައިވެސް، އޭނާ ބޭނުންފުޅުވާ ޒާތުގެ ކުލަތަކެއް
ޖައްސަވައިފިކަން ރާއްޖޭގެ އަދުގެ ސިޔާސީ މައިދާނުން އެއޮތީ
ސާބިތުވާސެވެ.
މަގުމައްޗަށް ނުކުމެ ރުޅިވެރިކަމާއިއެކު ބާރަށް ހަޅޭލަވާ،
ހަޑިހުތުރު ބަހުރުވައިން އިދިކޮޅު ޙަރަކާތަށް ޖަވާބުދެއްވުމަކީ
މައުމޫނުގެ ސިޔާސަތެއް ނޫނެވެ. ސިޔާސީ ޙީލަތާއި އުކުޅުތައް
ބޭނުންކުރައްވައިގެން އޭނާއެވަނީ މިއަދު ރާއްޖޭގައި އުފެދުނު
އިދިކޮޅު ޕާރޓީ އެމް.ޑީ.ޕީ ބިމާއި ހަމައަށް ތިރިކުރައްވާ،
މަޑުމަޑުން ޕާރޓީ ރޭހުގެ ކުރި ހޯއްދަވާފައެވެ.
އެންމެފަހުން އިއްޔެ ރޭ، 2007 ވަނަ އަހަރު އޭނާގެ ޕާޓީން ބޭއްވި
ފުރަތަމަ ޢަންމު ބައްދަލުވުމުގައި 2008 ވަނަ އަހަރުގެ ރިޔާސީ
އިންތިޚާބު ކާމިޔާބުކުރަން ޖެހޭނެ ކަމަށާއި، އެކަމަކީ އޭނާގެ
ޕާރޓީއަށް ނުވާވަރު ކަމެއް ނޫންކަމަށް ވިދާޅުވެ، އަދިވެސް އޭނާއަކީ
ސާބިތުކަމާއި ޔަޤީންކަމާއިއެކު ޤައުމުގެ ސިޔާސީ ހުންގާނުގައި
ހިއްޕަވައިގެން ހުންނެވި ބޭފުޅެއްކަން އެވަނީ
ސާބިތުކޮށްދެއްވާފައެވެ.
މައުމޫނަކީ ޑިކްޓޭޓަރަކަށްވިޔަސް، އަދި ރަސްކަލަކަށްވިޔަސް، 2006
ވަނައަހަރު ރާއްޖެއިން ފެނިގެން މިދިޔަ ސިޔާސީ ލީޑަރުންގެ ތެރެއިން
އަހަރުގެ އެންމެ ކާމިޔާބު ސިޔާސީ ޝަޚްޞިއްޔަތަކީ އޭނާކަމަށް
އިންކާރުކުރާނެ ދިވެއްސަކު ހުންނާނެކަމަކަށް ޤަބޫލެއް
ނުކުރެވެއެވެ. ރުހުނަސް ނުރުހުނަސް ޙަޤީޤަތް ވާނީ ޙަޤީޤަތަށެވެ.
ރައީސް މައުމޫނުގެ ސަރުކާރުން އޭނާ ސިފަކުރައްވަނީ "އުފެދުމާއި
ޠަބީޢަތުގައިވެސް ރައްޔިތުންގެ މީހެއްކަމަށެވެ. އަދި
ބިނާކުރެވެނިވި ވިސްނުމެއްގެ ވެރިއެއް" ކަމަށްވެސް މެއެވެ.
ނިމުނީ! |
